Les mots surlignés font l'objet d'une note
1Monsieur, au retour que j’ay faict de deça, j’ay déduict à madame de
2Savoye tout ce qui s’est passé, tant au démeslement de Mouraz que au faict
3du mariaige d’entre madamoiselle de Montavis et de moy, l’ayde que m’avez de votre
4grâce donné en l’un et la promesse de faire de mesme en l’autre. Là dessus, son
5altesse m’a tant voulu honorer que de vous en escrire et à madame de Gordes
6aussy, à laquelle je faiz en oultre scavoir bien au long de quelle composition
7je suys basty affin que selon cela, elle saiche comme asseoir les pierres du
8bastiment qu’elle a commencé à mon honneur et prouffict, avec obligation
9infinye vers vous deux. J’auray donc, Monsieur, seullement à vous
10supplier comme je faiz bien humblement, voulloir entendre de madite dame
11le tout, et puis voulloir si à propoz desployer toutes sortes d’armes pour moy
12que je puisse parvenir à l’honorable fin que je désire, demeurant assuré
13que je feray tel depportement et avantaige à la damoiselle qu’elle aura tousjours
14plus d’occasion de se louer de votre conseil et de moy, qui tascheray de ne
15mourir ingrat de grâce si singuliaire que j’estime ceste-cy. Leurs altesses,
16désirantz tousiours mieulx disposer cest affaire, escrivent parmy autres
17choses à monseigneur le marechal de Dampville qu’ilz recevront à grande
18courtoysie qu’il s’employe pour l’amour d’eulx à réduire monsieur le président
19Bellièvre d’avoir non seullement ce mariaige pour agréable, ains de s’y
20employer comme on dict jusqu’au coulde. Je vous supplie tres humblement,
21Monsieur, faire seurement tenir le paquet et davantaige, me recommander
22encor par voz lettres ausdits seigneurs.
23Les nouvelles qui courent icy, Monsieur, sont que Domp Joan qui avoit voulu
24aller en Espagne, a esté arresté par la protestation que feirent les Vénetiens
25de tenir en ce cas la Ligue pour rompue. Il s’est retiré à Naples et a desparty
26l’armée en Sicille, ayant eu commandement de son maître de se préparer pour sortir de bonne
27heure à ceste prime. Monseigneur le cardinal de Lorraine doit arriver
28icy le XIIIIe du présent. Monsieur de Ramboullet passa hier allant à Romme
29prester l’obeissance. Il a fort conjuré son altesse d’estre compère et de donner
30jusques à Paris. Il accepte la faveur, pourveu que ce soit à Lyon. Madame dict de
31mesme, ce sera à leurs majestez à se resoudre.
32Monsieur, je supplie le Créateur vous donner longue vye. De Thurin, ce IIIme décembre, votre humble et ancien serviteur.
33Du Villars
34Il vous plaira par le retour de mon laquaiz me donner advis
35de la réception de mes lettres et avec le temps de ce qu’il vous
36aura pleu faire pour moy.